Thang duhawm (Hmangaihna)

 

Tue maw chu daidanna bang sangtak karah awm chung siin I hmangaih tlat  tawh thin em? I chhungril ngaihtuahna aluah a, mahse au chhuah pui turin chakna I nei silo, chakna chu nei ngawt mahla huaisenna I nei silo, huaisenna pawh chuan in thuam tehreng la chan hlauhna avangin I nihna ramri chu I kan ngamlo thin em? Heihi hringnun chu a ni a, heihi thang duhawm tak maimichhinga mi tam takin an pal per thin chu a ni!! Hmangaihna hi..

Amah Rev. Lalpeklien Sungte tawngkam hawhin, mahni rilru ngei pawh hi a insual a insual ve fo, a lo tih ang hian, keimahni a  keimahni ngei hi a insual thin a, thang duhawm tak chu thang a ni tih hre reng chung pawha maimitchhing a dai mai hi a chakawm chang a awm thin. Kan duhthlanna hi chu a tluk der chang a awm a, Sakhi thang awk ang maia atan chang a awm thin, kan dai chuan kan talchhuak dawnlo tih hi Luka ziak tluka chiang nimahsela pal per mai hi a chakawm thin a, tamtakin an palper a, tifuhta leh tifuhtalo pawh an awm ngei ang, chuvang chuan kei ngei pawh hi ka chhia leh tha hriatna la nung tawk tawk hian chu thang dai per lo tur chuan min chelh fan fan a, engtia rei nge min chelh ang erawh zawng ka hre thiam lo le.

Chu thang chu hran san ka tum poh leh ka hnaih zual a, theihnghilh ka tumna a san poh leh ka riatrengna a luah zau thung a, thup ka tum nasat poh leh ka puangzar ting a ni lawi si. Chik taka min entu tan a lang sar a, min en thuaktu tan lah hai rual  a nilo. Ka tan beisei tur a awm lo tih ka hre reng a, mahse beisei tur awmlo chu ka beisei ru lawi si. A kianga awm chu nuam ka ti a, ka nun a hahchawl a, keimah hi ka intheihnghilh thin, mahse chu ngei chu ka phur ti rit zualtu a ni a, ka hahdamna ngei chu ka zan muttheih loh chhan a ni lawi si. Aw hrethiam tehreng sela aw, engtin tak ngai ang maw?? Chu zawhna pakhat chauh pawh chu ka zawh ngam loh zawhna a ni a, chhanna ka hriat chak ka dawnsawn ngam siloh chu a ni si. Kan daidanna bang hi a sang em a, lawnliam ta pawh nita tehreng ila apiah lamah chuan engin nge min lo hmuak ka hre silo.

Ka chhungril hi a hmaah chuan chhawpchhuak ta ang ila, atan hnawmhne mai a chang awm si a, anih lohvek pawhin, lo lawmin lo pawm ta pawh nisela, khawvel chu a la nunrawng ta reng reng dawn tho si. Englai khan nge he li ah hian ka luh a, suar pui hian min nan ka hrelo, tunah chuan ka tanna thliarkar hi ram reh ang a ni zo ta a nih hi. Hrethiam teh reng se engtin tak ngai ang maw?? Nilo, hrethiamlo sela a hahdam zawk ang. Aww.. thang duhawm, maimichhing in ka dai mai dawn che em ni?

Hrethiam tura ka duh hi hrethiam ta ang sela, “ka chhungril chu lawm leh mangang hlauthawngin a nui lungngai si a nih hi” a tih ang mai hian, chhunglam chu buai namen in a buai lo ang a, ka hlimna leh ka lungngaihna chu a inbuk tawk viau ta ve ang. Areh ri ka tan a rin zia hi hrethiam ta se, min reh san kumkhua ang nge, ka tana thawm ngaihthlak nuam tawk chauhin thawm min chhuah sak ang le? Zing tin hian a mi hmuahna thuthawn chu dawng ta ila, khum laizawl ka thlen hma hian a duhsakna chu dawng ta fo ila, nilo nilo chutiang ringawt lo beisei pawh chu ka tan chuan a sang lutuk a, ka phak lo a ni zawk.

A kiangah chuan awm ila, ka kiangah hian a thla muang ta ang sela, ka induh phah lutuk lawng maw?? Nilo, tuemaw chuan thlamuanna pe ta ang zawk sela, chu chu hringnun her rem dan zawk chu a ni ang, mahse ka tan chuan lungngai chunga nuihna phairuam ngei chu a ni lawi si ang. Hlim se ka duh a, a hlimna tur chuan theihtawp ka lo chhuah pawh a ni mahna, mahse tuemaw kiangah hlimna chu zawng hmu ta si se, a hlimna chu ka duh tak meuh meuh ang em?

A hmel leh kimtlang chu engpawh lo nise, a lo chhuahna chu khawi ram pawh nise, a chawitleitu kut chu eng ang pawh lo ni sela, a thlirtu thinlung lama lunghlu a chan phawt chuan, tu in nge chutiang khawp a duhawm chu hnawl thei ang ni, a sulhnu chu engang pawh lo nise, hnawkin chingchivet viau mahsela, a thlirtu thinlungah a fel miau si chuan, tunge chu mi zuna uai chu dem thei ang ni? A thlira chu thang a nih ngawt siloh chuan!

“A inngaihtlawmna chu thang a ni si a,”  a kam thatna chu hmu thiam lovin, a hawihhawmna chu man phaklo ta ang ila, a nui rite chu kan tan emaw tiin, a hahdamna chu keimahni lamah emaw a awm tita ang ila, a thu thawnte chu dawng thin in, kan zawhna te chu chhang thin ta ang sela, a hunawl chu kan tan hmangin,  a inngaihtlawmna chu ngaihhai ta ang ila, a chhungril chu ka lakah hel si sela, a mi tenna chu hawihhawmna in tuam mawiin, a mi ngeina te chu nuihna in hliah thin ta ang sela, a thuthawnna kut zung leh a chhung ril chu mei leh tui ang lo ni se, chu ngei chu thang hlauhawm ber chu a ni lawng maw? Ka duhna mit meng hian a mi chhawnna thutak chu hmu theilo in, ka atchilhna mit vai hian thutak chu hmu phe tlat si se, a tan chuan phurrit ka ni mai lawng maw?? Aw, pen khat chauh pawha hnaih hi a va har thin em.

“Aw thang duhawm, hmu reng chungin maimichhingin ka dai per dawn che em ni?” heng zawng zawng ka ngaihtuah hian, ngaihtuah loh chu ka duh a, khawvel a mum miau si a, hnungtawlh san pawh ni ila, kawng engemaw zawng chuan a ni chu ka hnaih tho tho chu a ni si, pal siamin, ram chu ping dang thin mah ila, ri te siamin, rite kham thin mah ila, thawm a neih a, ka lam a hawi phawt chuan, ka theitawk atan a tih chu ruihhlo ngawl vei ang mai hian, ka bansan theilo chu a ni si. Hei hi hmangaihna a nih chuan ani chu ka hmangaih a ni ang a, alaka ka awmdan chu khawngaihna a nih chuan ani chu ka khawngaih a ni ngei ang, alaka ka tih thinte hi inpekna a ni an tih chuan  ka in pumpek pawh chu a ni mahna! Ka laka athatna chu remchanga la ka nih a, a hawihawmna chu hrethiamlo ka nih pawhin, a pawilo e, atan ka awm tho chuan! Ka tha chakna chu remchangah la a, ka hriatna chu remchanga hman a, atana ka inpekna pawh chu hlawknan a lo hmang anih pawhin, chutiang chu a lo ni a nih pawhin, ka ngaihhaina nen chuan a inhen tawkah kan ngai tal a niang chu… Aw thang duhawm, maimichhingin ka dai per mai dawn che em ni?

 

He thu Lalsangzuala ziah, mizo thawnthu behchhan Duhmanga leh Dardini drama a mi thu hi ka hmuh phat atangin ka mit a la a, ka suangtuahna a luah a, zah pawh dawn loin hriatchian chakin ka va zawt thuai a, Duhmanga leh Dardini te hmangaihna li zawng hrethiam in chhiar ve lo mah ila, a thu hi a ril ka ti a, ka ngaihtuahna khawvel thar min siam sak a, A ziaktu ziakchhan lam ngaihtuah lekloin rilru in tumkawng dang a rek a, chuti khawpa tlangval duhawm Lalfapa hma a tlawmta Dardini chan ram chu ka ngaihtuah thin a, he thu hi ka ziak ta a ni.