INPEIH THUAI RAWH - Dr Ramdinthara Sailo hla Thlirna tlang dang atangin.

                                   Aw ka dam chhung nite hai lo ten a liam zel e,

                                    Pan leh vanglai nite pawh chuaiin an her liam a;

                                    Sanna leh hausakna ten kum tam a daih nem le,

                                    Saruak maia kir lehin an her liam thin.

 

Dam chhung khawsak lungkhamna a khat mihring nun hi ka ngaihtuah thin a, nawmsakna um lo mihring hi kan  awm dawn em ni aw ka ti? Kristian nun ngei pawh hi thlirna tarmit dang atanga han thlek chuan he khawvel piahlam rama nawmsak duhna avangin kan damlai nun kan dahkham a ni ve thei reng mai. Thuhriltu chuan nun hi engmah lo mai a lo ni a ti a, engmah lo mai nun hi eng emaw nih tir tum a kan tlan nasat thin zia ka ngaihtuah kai phei hi chuan Lal Davidan “mihring hi enge maw ni a I hriatreng thin ni”, a lo ti hi Amen pui thlap tur kan lo ni reng mai. Kan duh em avanga mahni dung chen pawh belh thei hleilo hringnun hi thlahlel in sulrul leh tuiek te eichhiat theih ro umin kan intlansiak mek chu a ni si, hausa ten neihbelh kan duh a, retheite lahin nun nawmsak ve na kan um zel bawk a, nimahsela he fakhla siamtu erawh hi chuan he lei a kan khualzin chhung ni rei loh zia hi a hmu chiang ngawtin ka hria, kan dam chhungni a herliama an ti te te a, chumai duhtawk lovin kan thatlai nite pawh chuaiin an herliama an ti chhunzawm ngat a, hringnun a thlirna kawngah kher kher hi chuan Lal Solomona em chu han khing zolo pawh nise, an thutna tlar lam zawng a inhlat bik hauhin ka ring lo. Ni e, rawngbawltute tawngkam han hawh ve lawk ila, kan khualzin kum hi a reilo a sin, kum 20 ral kai hnu phei hi chuan kum te hi an liam zung zung tawh mai thin a, ni 365 hi tum tih hlawhtlin nan a reilo mah mah thin a nih hi, ni an liam a, kan inrin hma in thla a lo liam a, ruahmanna kan siam meuh chuan kum hi a lo ral leh mai thin.  Chutiang hringnun chu kan zinkawng a nih tlat avangin hmingthain sum leh pai, rohlu te hi ngah viau pawh ni ila kan tawpna chu lei daiah, thingpui rem chhunga tlumpite ruai chaw mai a ni tho si, Hamleta tawngkam takin, mi hausa leh rethei deuh te pawh hi ruai chaw tui leh tuilo kan ni ve leh mai chu anih hmel, chuvangin engmah luhpui lova kan lawiluhna khawvel hi saruakin kan her liam san leh mai dawn a ni, chutih hunah chuan Bank account in awmzia a nei pha tawh lo anga, in ropuiin hlutna a nei tawh lovin, Gandhi hlimthla chuanna lehkha phek ngei pawh hian kan tan awmzia a nei tawh dawn silo, thihhnu a kal ut ut mihring hre ngailo pawh ni ila ka thlarau hi zawngin kawng tum thar a zawh dawn chiang a ni tih hi chu inhrilh nawn kan ngai hauh lovang le, chuvangin kan thlarau nun hi a dam tlang em tih hi inzawh nawn fo a va ngai em?

 

                        Inpeih thuai rawh,

                        Chhum zingah a lo kal dawn;

                        Tap chungin I in leh lo kalsan a tul tawh ang,

                        Khawngaih hun a liam tawh ang.

 

Enge kan in anga, enge kan ei ang? Enge kan silh anga, enge kan fen ang? Ti reng reng a hun kan chhiar lai hian Gehena a thlarau leh taksa ti boral theitu erawh hi chu kan mamawh chang a kan lam bak hi chu kan vei tehchiam lo ni hian a lang thin, langlo tura thuhruk engmah a awm dawnlo tih hrereng chunga ringtu fianrial ngamlo kan tamtak zia ngaihtuah hian kan kristianna kawrmawi hi kan thlak a, saiip puan sina vaivuta thu chunga kan in lamlet hi a tul mai ni lovin a tul tak zet zet tawh a nih hi maw, kan tunlai khawvel thlir hian inpeih lote kan inpeih a hun tawh takzet a ni, warning bell nghak hman pawh kan ni tawh lo a ni ber e, muanga a lan angin Krista chu a thutiam kawngah chuan a muang silo a, “nang mi a zaninah I thi dawn”, tih hi nang leh keia chunga thleng thei thudik kan pawm duh siloh a ni mai lo maw! Thu khuh chunga thusawi thiam te hian mi ngainat an hlawh duh phian a, a ruhlanga au thinte hian mawl nih an hlawh chawk, chutiang chu ni mahsela he hla phuahtu hi chuan inpeih a tul zia chu peh hel eih lovin “Inpeih thuai rawh u”, ti zawngin a sawi mai a, Jona’n “Ninevi hi tih boral a ni dawn e,”- a tih nen khan a pawimawh dan leh awih duhlo tana a nghawng pawi zia chu ziah loh hian a chiang zawk mah chu a nih tho si hi. Khawngaihna a khawngaih leh chhawnna changtu, tlanna avanga Pathian nei ve, inlarna avanga kan chhandamna tur tihngheh saka awmte hi khawngaihna hun hian min la liamsan ngei dawn a, chu mi ni ah chuan chhum zingah khian chhandamte an inkhawm a nga, hawilopar tawnin lei nun hi an ngai dawn silo, enge nang i dinhmun ve le? Tap chunga he khawvel a kan  ropuina kalsan hian chatuan a Zero-in hremhmunah kan liam mai dawn nge, grep taka zarzawma kan awm chhung hian theih tawp a lal rawng bawlin kan khawnvar mit lova siamin chatuana chawl ve turin kan lo inpeih zawk dawn le?

 

                        Lalthutthleng var hmaa hnam ze tin an inkhawmin,

                        Nunna bua ziak anga kan hming an lam hun chuan;

                        Lawm avanga mittui nen, tlantu chibai bukin,

                        A ropui tur zia chu aw ka sawi thei lo.

 

He khawvel ram ropui ber pakhat America president te hawi lam mahin khawvel a sawinghing thin anih hi chuan, ram pakhat mai nilo, he khawvel leh van thengreng te nen lam a dintu, leilung nghahchhan phum a, vante kaipharh a, Solar system orbit te nen lam a buhfang tiat pawh a tihsual nei miahlo a remkhawm a, suihkhawmtu, lalte lal meuh in lalthutthleng hma a ro an rel tur chu rinna mit meuh pawh hian a ropui tur zia hi a ring dik thei ngut hian ka ring thin lo, chu achhapah hnam tin ze tin te kan han inkhawm hup hup mai dawn a ni a, inkhawmpui tiak leh thinna he khawvel maha thlarau lam hla nen van nun kan tem thin hi ropui tih tawh nak a laiin, inkhawmnpui tiak tawh lo tur han ropui tur zia chu lei tawng hian ka sawi thei lo ani top’s mai a ni. Gas latur intlar zinga a hmasa lama kan number a awm pawhin kan hlim ru veng veng a ni a, he khawvela induhsakna leh inchawimawina kawngah kan hming lamchhuah a ni mah a kum a kum tel kan uanpui thin a nih si chuan Rangkachak khawpuia kan hming an han lam tur chu a lawmawm na nasat dan tur ka ngaihtuah ringawt pawh hian mahni hmasial ran chunga mahni te chauh a van lawn mai hi ka duh rum rum thin. Chutiang taka lawmna ropui tur chu hlaphuahtu hian a hmu chiang hle a nia nge, lawm avanga mittui nen tlantu chibai bukin an ti lungkuai ngaih mai a, ani tak a sin hringnun duangtu hian mittui hi ahmaih ang tih hi ka hlau thin, hringnun rahbi zawng zawngah hian mittui hian hnuhma a chhawp vek ni mai hian ka hre thin. Thenkhatin an lungngaihna vawrtawp pho chhuah nan an hmang a, a thenin lainatna vawrtawp, athen tan lah midang hnehna hmanraw tha eltiang, mittui nena inkaihhnawihna neilo hi kan nun ah hian a awm lo tawp ni mai hian ka hre thin, kan hlimna in a tawnsan lai ber pawh hian mittui tho hian lawmna zuk ti famkim tlat thin a, chutiang taka thilsiam ropui hmanga a siamtu laka lawmna lantir chunga chibai han buk chu, Kalvari tlanga tlanna hna ropui rapthlak rawn thawktu pawh hian Golgotha hmuna a tawrhna theihnghilh thak khawp a alo lawm bik hi ka ring deuh tlat zuk nia.

 

            Lal Isua nei si lova thlafam I chan ni chuan,

            “Khawngaih takin kawng min hawn rawh,” tap chungin dil mahla,

            “Tunge I nih ka hre lo che,” tih hnawlna an ka chu,

            A rapthlak tur zia chu aw, ka sawi thei lo.

 

Jerusalema ruai chaw kil hun a kawrmawi hak nawm dan tur zia sep rawtui zo chiah in, Mo neitu Isua neih ve loh pawi dan tur an rawn sep chhuak leh nghal mai hian vanram nawm bik tur zia hia ati chiang bik ngawih ngawih hian ka hria, Isua neilo han tih lai tak hi Paula dan takin, thuril thuk tak hmuh hian ka zuk hmu tlat pek a, hla siamtu nen hian he thilah kher hi chuan zaikhatah kan luang chiahin ka ring lo a, mahse ka indem hranlo, Amah pate palian fam Lerthansunga pawhin bo pathum theology kha thuthlung hnapin a thlanvawng sum tuk a ni lawmni kha, Isua neilo lai tak chu thuthlunga chhum hmin theology in I han phan kual vel dawn ang aw, Paula chuan Krista neitu anih thu hi a aupui awl lo mai a, a chhinchhiahna a put hial thu intithei takin Galatia mite hmaah a uanpui a nih kha maw, kha chhinchhiahna kha engdang hi nithei hian ka hmu mawlh lo a, Tui leh thlarau a chhinchhiahna bak hi han puh thluk tur dang hi ka hre zo ngang lo, achhan chu kha chhinchhiahna kha a lehkhathawn kohhrante hnenah khan an pu ve vek a ni tih hi mawihnai takin zuk zep tel vek duh a, mitin hian kan ta hi kan chhinchhiah thum vek a, kan kawtlai pangpar atanga kan khumphah puan par dan thleng hian kan hre kar vek chu a nih hlawm hi. Mihring mah chutiang kan nih chuan Krista chhinchhiahna pu ho hi chu kan samzai nen lama hretu hi chuan a hre dawn tih hi ka beng ka hre chiang tluk in ka chiang tlat. Chu chhinchhiahna, langthei a chhinchhiahna nilo tui leh thlaraua chhinchhiah thuthlung fate hi Isua neitu chu kan ni mai hian ka hria a, kan vanneih zia hi hria a insawichhe tawn lova Lal fak mai tur hi kan ni mawle, a phuahtu phuahchhan lam ngaihtuah lek lo a han sep tuihnai chhunzawm pawh chak awm viau mah sela, hla phuahtu in a duhthusam zan a aduan chhuah, Isua nei siloa thlafam I chan ni chuan tih lam hi I hrut zawk dawn teh ang, thi tur a piang mihring, vaivuta din hi kan la thi dawn chiang si a, Isua tello, Isua chhinchhiah loh hian kan thi mai ang tih hi a hlauhawm hle in ka hria, chu chu hla siamtu pawh hian hmu chiang in, he khawvel kan awm chhung nun pawimawh zia hi thiamtakin Bible chang hmangin an rawn thlep lut zalh mai a nih hi, “Khawngaih takin kawng min hawn rawh,” tap chungin dil mahla,“Tunge I nih ka hre lo che,” tih hnawlna an ka chu,A rapthlak tur zia chu aw, ka sawi thei lo. Lal rawngbawl lo hian damchhung ni, hlobet anga vuai leh mai thin hi kan lo chen anga, Rihtlang piah lama kawngkharmawi thleng pha lo hian “Ka hre lo che” tiin talent tipung velo chhiahhlawh ang mai khan tah leh hathialna lamah min tir liam ang tih hi a hlauhawm ngawt tak a sin. Chatuan rei zia chu number kan hriat tam ber hi sawi ila chu pawh chu chatuan intanna a la nip ha lo hial ang chu, meisi deh zeuh mai pawh a au tial ruan ruang thin mihring tan hi chuan chutiang khawp a rei tihhreawmna han tawrh dawn mai chu rapthlak hian sawifiahna dang nei se, chu ai pawh chuan ala rapthlak zawk hial ang, mihring tawng chu sawi loh vantirhkoh tawng hmang Gabriela te meuh pawh khian sawi ngaihna an hre lo tawp ang le.

 

Atawp ber atan chuan he hla siamtu in a min duh ber ni alang chu nikin ni alo thlen hma a inpeih taka Lal Krista lo nghak a, chatuan nunna chang ngei tur a lo inbuatsaih hi niin alang a, chu chatuan khawpui, puanvar sinte lenna, “Beramno chu athianghlim e,” ti a an zaina hmuna lut tur chuan nang leh I chhungte in inpeih em le?